Истражувачко друштво на студенти биолози (ИДСБ)

Една мошне значајна заложба на Институтот за биологија е создавањето услови за реализација на студентската иницијатива за формирање истражувачко друштво на студентите биолози (ИДСБ) во 1994 година. Истражувачко друштво на студенти биолози (ИДСБ) е младинска истражувачка организација, која се занимава со едукација на студентите и членовите во областа на биологијата, истражување и изучување на биодиверзитетот на Р. Македонија и ширење на еколошката свест кај младите.

За успешна реализација на истражувањата, теренската работа во Друштвото е поделена во секции: алголошка, флористичка, миколошка, арахнолошка, ентомолошка, херпетолошка, орнитолошка, мамолошка, ентомолошка и малаколошка секција. Како резултат на добрата организираност, во последните 10 години ИДСБ успешно реализирало многу истражувачки теренски акции, а резултатите од овие активности се објавени во петте издадени броја на Билтенот на Истражувачкото друштво на студенти биолози. Својата основна цел за едукација на студентите, ИДСБ ја остварува главно преку организирање истражувачки проекти. Досега се организирани и се реализирани 31 истражувачки проекти на кои учествувале повеќе студенти од Институтот за биологија, (моментално има околу 300 членови) како и студенти од сродни институти од други универзитети од Балканот и пошироко. Својата активност друштвото ја остварува и преку учество на конгреси и семинари и публикување на трудови, а досега се одржани и 14 Биофотоконкурси отворени и за пошироката јавност од земјава и странство. 

Многу повеќе информации поврзани со ИДСБ, може да се најдат на официјалниот веб сајт на друштвото http://idsbiolozi.com